Of the precious blood. I don't know if it's approved, but hey, I found it.
Ad I Vesperis:
hymnus:
Festívis résonent cómpita vócibus,
Cives lætítiam fróntibus éxplicent,
Tædis flammíferis órdine pródeant
Instrúcti púeri et senes.
Quem dura móriens Christus in árbore
Fudit multíplici vúlnere sánguinem,
Nos facti mémores dum cólimus, decet
Saltem fúndere lácrimas.
Humáno géneri pernícies gravis
Adami véteris crímine cóntigit:
Adami intégritas et píetas novi
Vitam réddidit ómnibus.
Clamórem válidum summus ab æthere
Languéntibus Géniti si Pater áudiit,
Placári pótius sánguine débuit,
Et nobis véniam dare.
Hoc quicúmque stolam sánguine próluit,
Abstérgit máculas; et róseum decus,
Quo fiat símilis prótinus Angelis
Et Regi pláceat, capit.
A recto instábilis trámite póstmodum
Se nullus rétrahat, meta sed última
Tangátur; tríbuet nóbile præmium,
Qui cursum Deus ádjuvat.
Nobis propítius sis, Génitor potens,
Ut, quos unígenæ sánguine Fílii
Emísti, et plácido Flámine récreas,
Cæli ad cúlmina tránsferas. Amen.
Ant: Quis est iste qui venit de Edom tinctis véstibus de Bosra? iste formósus in stola sua.
Dixit Dóminus Dómino meo:*
«Sede a dextris meis,
donec ponam inimícos tuos*
scabéllum pedum tuórum».
Virgam poténtiæ tuæ emíttet Dóminus ex Sion:*
domináre in médio inimicórum tuórum.
Tecum principátus in die virtútis tuæ,†
in splendóribus sanctis,*
ex útero ante lucíferum génui te.
Iurávit Dóminus et non pænitébit eum:*
«Tu es sacérdos in ætérnum
secúndum órdinem Melchísedech».
Dóminus a dextris tuis,*
conquassábit in die iræ suæ reges.
De torrénte in via bibet,*
proptérea exaltábit caput.
Ant: Ego qui loquor justítiam et propugnátor sum ad salvándum.
Confitébor Dómino in toto corde meo,*
in consílio iustórum et congregatióne.
Magna ópera Dómini,*
exquirénda ómnibus, qui cúpiunt ea.
Decor et magnificéntia opus eius,*
et iustítia eius manet in sæculum sæculi.
Memóriam fecit mirabílium suórum,*
miséricors et miserátor Dóminus
Escam dedit timéntibus se;*
memor erit in sæculum testaménti sui.
Virtútem óperum suórum annuntiávit pópulo suo,†
ut det illis hereditátem géntium;*
ópera mánuum eius véritas et iudícium.
Fidélia ómnia mandáta eius,†
confirmáta in sæculum sæculi,*
facta in veritáte et æquitáte.
Redemptiónem misit pópulo suo,*
mandávit in ætérnum testaméntum suum.
Sanctum et terríbile nomen eius.*
Inítium sapiéntiæ timor Dómini,
intelléctus bonus ómnibus faciéntibus ea;*
laudátio eius manet in sæculum sæculi.
Ant:Pater per sánguinem crucis Christi, pacificávit sive quæ in terris, sive quæ in cælis sunt.
Christus Iesus, cum in forma Dei esset,*
non rapínam arbitrátus est esse se æquálem Deo,
sed semetípsum exinanívit
formam servi accípiens,†
in similitúdinem hóminum factus;*
et hábitu invéntus ut homo,
humiliávit semetípsum†
factus obœdiens usque ad mortem,*
mortem autem crucis.
Propter quod et Deus illum exaltávit†
et donávit illi nomen,*
quod est super omne nomen,
ut in nómine Iesu omne genu flectátur
cæléstium et terréstrium et infernórum
et omnis lingua confiteátur:*
«Dóminus Iesus Christus!»,
in glóriam Dei Patris.
Lectio brevis: 1Petr.1; 18-21
Scientes quod non corruptibilibus argento vel auro redempti estis de vana vestra conversatione a patribus tradita, sed pretioso sanguine quasi Agni incontaminati et immaculati Christi, praecogniti quidem ante constitutionem mundi, manifestati autem novissimis temporibus propter vos, qui per ipsum fideles estis in Deum, qui suscitavit eum a mortuis et dedit ei gloriam, ut fides vestra et spes esset in Deum.
Resp.Brev.
V. Redemísti nos, Dómine*in sánguine tuo.
R, Redemísti nos, Dómine* in sánguine tuo.
V.Et fecísti nos Deo nostro regnum.
R. In sánguine tuo.
V.Gloria Patri.
R. Redemísti nos, Dómine*in sánguine tuo.
Ad Magnif.Ant: Accessístis ad Sion montem, et civitátem Dei vivéntis, Jerúsalem cæléstem, et Testaménti novi mediatórem Jesum, et sánguinis aspersiónem mélius loquéntem quam Abel.
Preces:
Preces nostras committámus illi qui potens est salvos perfécte fácere omnes accedéntes per Ipsum ad Patrem, et supplíciter dicámus: Exáudi, Dómine, oratiónem nostram.
Christe, usque ad mortem obœdiens facte,
-da ut Ecclésia tua dócilis sit actióni Spíritus tui.
Christe, Via, Véritas et Vita,
-sanctífica sacerdótes tuos in veritáte.
Christe, Fili Dei vivéntis, supplíciter te rogámus,
-cunctis nobis dona spíritum Filiórum Dei Patris nostri.
Christe Iesu, Patris glorificátor,
-fac ut semper quærámus ante ómnia Regnum Dei.
Christe Deus, Vita et Resurréctio nostra,
-fac ut fratres nostros iam mórtui intueántur glóriam vultus tui.
Pater noster.
Oratio:
Deus, qui pretióso Unigéniti tui Sánguine univérsos hómines redemísti, consérva in nobis opus misericórdiae tuae, ut, nostrae salútis mystérium iúgiter recoléntes, eiúsdem fructum cónsequi mereámur. Per Dóminum.
Ad Laudes:
Salvéte, Christi vúlnera,
Imménsi amóris pígnora
Quibus perénnes rívuli
Manant rubéntis sánguinis.
Nitóre stellas víncitis
Rosas odóre et bálsama,
Prétio lapíllos Indicos,
Mellis favos dulcédine.
Per vos patet gratíssimum
Nostris asylum méntibus;
Non huc furor minántium
Umquam penétrat hóstium.
Quot Jesus in prætório
Flagélla nudus éxcipit!
Quot scissa pellis úndique
Stillat cruóris gúttulas!
Frontem venústam, proh dolor!
Coróna pungit spínea,
Clavi retúsa cúspide
Pedes manúsque pérforant.
Postquam sed ille trádidit
Amans volénsque spíritum,
Pectus ferítur láncea,
Geminúsque liquor éxsilit.
Ut plena sit redémptio,
Sub torculári stríngitur;
Suíque Jesus ímmemor,
Sibi nil resérvat sánguinis.
Veníte quotquot críminum
Funésta labes ínficit;
In hoc salútis bálneo
Qui se lavat, mundábitur.
Sedénti habénda est grátia,
Qui nos redémit sánguine,
Sanctóque firmat Spíritu. Amen
Ant: Ideo sunt * ante thronum Dei et sérviunt ei die ac nocte.
Ps.62
Deus, Deus meus es tu,
ad te de luce vigilo.
Sitivit in te anima mea,
te desideravit caro mea.
In terra deserta et arida et inaquosa,
sic in sancto apparui tibi,
ut viderem virtutem tuam et gloriam tuam.
Quoniam melior est misericordia tua super vitas,
labia mea laudabunt te.
Sic benedicam te in vita mea
et in nomine tuo levabo manus meas.
Sicut adipe et pinguedine repleatur anima mea,
et labiis exsultationis laudabit os meum.
Cum memor ero tui super stratum meum,
in matutinis meditabor de te,
quia fuisti adiutor meus,
et in velamento alarum tuarum exsultabo.
Adhaesit anima mea post te,
me suscepit dextera tua.
Ant: Ideo sunt * ante thronum Dei et sérviunt ei die ac nocte.
Ant: Ipsi vicérunt dracónem propter sánguinem Agni et propter testaméntum Verbi sui.
Benedícite, ómnia ópera Dómini, Dómino,*
laudáte et superexaltáte eum in sæcula.
Benedícite, cæli, Dómino,*
benedícite, ángeli Dómini, Dómino.
Benedícite, aquæ omnes,
quæ super cælos sunt, Dómino,*
benedícat omnis virtus Dómino.
Benedícite, sol et luna, Dómino,*
benedícite, stellæ cæli, Dómino.
Benedícite, omnis imber et ros, Dómino,*
benedícite, omnes venti, Dómino.
Benedícite, ignis et æstus, Dómino,*
benedícite, frigus et æstus, Dómino.
Benedícite, rores et pruína, Dómino,*
benedícite, gelu et frigus, Dómino.
Benedícite, glácies et nives, Dómino,*
benedícite, noctes et dies, Dómino.
Benedícite, lux et ténebræ, Dómino,*
benedícite, fúlgura et nubes, Dómino.
Benedícat terra Dóminum,*
laudet et superexáltet eum in sæcula.
Benedícite, montes et colles, Dómino,*
benedícite, univérsa germinántia in terra,
Dómino.
Benedícite, mária et flúmina, Dómino,*
benedícite, fontes, Dómino.
Benedícite, cete et ómnia
quæ movéntur in aquis, Dómino,*
benedícite, omnes vólucres cæli, Dómino.
Benedícite, omnes béstiæ et pécora, Dómino,*
benedícite, fílii hóminum, Dómino.
Bénedic, Israel, Dómino,
laudáte et superexaltáte eum in sæcula.
Benedícite, sacerdótes Dómini, Dómino,
benedícite, servi Dómini, Dómino.
Benedícite, spíritus et ánimæ iustórum, Dómino,*
benedícite, sancti et húmiles corde, Dómino.
Benedícite, Ananía, Azaría, Mísael, Dómino,*
laudáte et superexaltáte eum in sæcula.
Benedicámus
Patrem et Fílium cum Sancto Spíritu;*
laudémus et superexaltémus eum in sæcula.
Benedíctus es in firmaménto cæli*
et laudábilis et gloriósus in sæcula.
Ant: Ipsi vicérunt dracónem propter sánguinem Agni et propter testaméntum Verbi sui.
Ant: Vestítus erat veste aspérsa sánguine, et vocátur nomen ejus Verbum Dei.
Cantáte Dómino cánticum novum;*
Laus eius in ecclésia sanctórum.
Lætétur Israel in eo, qui fecit eum,*
et fílii Sion exsúltent in rege suo.
Laudent nomen eius in choro,*
in týmpano et cíthara psallant ei,
quia beneplácitum est Dómino in pópulo suo,*
et honorábit mansuétos in salúte.
Iúbilent sancti in glória,*
læténtur in cubílibus suis.
Exaltatiónes Dei in gútture eórum*
et gládii ancípites in mánibus eórum,
ad faciéndam vindíctam in natiónibus,*
castigatiónes in pópulis,
ad alligándos reges eórum in compédibus*
et nóbiles eórum in mánicis férreis,
ad faciéndum in eis iudícium conscríptum:*
glória hæc est ómnibus sanctis eius.
Ant: Vestítus erat veste aspérsa sánguine, et vocátur nomen ejus Verbum Dei.
Lectio brevis Ap 5, 9-10
Dignus es, Dómine, accípere librum, et aperíre signácula eius, quóniam occísus es et redemísti Deo in sánguine tuo ex omni tribu et lingua et pópulo et natióne et fecísti eos Deo nostro regnum et sacerdótes, et regnábunt super terram
Responsorium breve Ap 1, 5b-6a
V.Christus diléxit nos et lavit nos*in sánguine suo.
R.Christus diléxit nos et lavit nos *in sánguine suo.
V.Et fecit nos Deo, regnum et sacerdótes.*In sánguine suo.
R.Glória Patri.
V.Christus diléxit nos et lavit nos*in sánguine suo.
Ad.Bened.Ant: Erit sanguis Agni vobis in signum, dicit Dóminus ; et vidébo sánguinem, et transíbo vos nec erit in vobis plaga dispérdens.
Preces
Christum salvatórem, qui per mortem et resurrectiónem suam nos redémit, implorémus: Dómine, miserére nostri.
Qui Ierúsalem ascendísti ad passiónem subeúndam, ut intráres in glóriam,
-perduc Ecclésiam tuam in Pascha æternitátis.
Qui, in cruce exaltátus, láncea mílitis transfígi voluísti,
-sana vúlnera nostra.
Qui crucem tuam árborem vitæ constituísti,
-fructus eiúsdem baptísmate renátis largíre.
Qui, in ligno pendens, latróni pæniténti pepercísti,
-nobis peccatóribus ignósce.
Oratio.
Deus, qui pretióso Unigéniti tui Sánguine univérsos hómines redemísti, consérva in nobis opus misericórdiae tuae, ut, nostrae salútis mystérium iúgiter recoléntes, eiúsdem fructum cónsequi mereámur. Per Dóminum.
Ad horam Mediam
Psalmodia complementaris
Ad tertiam
Lectio brevis Ez 33, 10b. 11a
Iniquitátes nostræ et peccáta nostra super nos sunt, et in ipsis nos tabéscimus; quómodo ergo vívere potérimus? Vivo ego, dicit Dóminus Deus; nolo mortem ímpii, sed ut revertátur ímpius a via sua et
V./Sanguis Jesu Christi Fílii Dei.
R./Emúndat nos ab omni peccáto.
Ad sextam
Lectio brevis Hebr 9, 11-12
Christus cum advénit póntifex futurórum bonórum, per ámplius et perféctius tabernáculum, non manufáctum, id est non huius creatiónis, neque per sánguinem hircórum et vitulórum sed per próprium sánguinem introívit semel in Sancta, ætérna redemptióne invénta.
V./Justificáti in sánguine Christi.
R./Salvi érimus ab ira per ipsum.
Ad nonam
Lectio brevis Hebr 10, 19-23
Habéntes ítaque, fratres, fidúciam in intróitu sanctórum in sánguine Iesu, quam initiávit nobis viam novam et vivéntem per velámen, id est carnem suam, et sacerdótem magnum super domum Dei, accedámus cum vero corde in plenitúdine fídei, aspérsi corda a consciéntia mala et ablúti corpus aqua munda, teneámus spei confessiónem indeclinábilem, fidélis enim est, qui repromísit.
V/.Communicántes Christi passiónibus gaudéte
R/.Ut et in revelatióne glóriæ eius gaudeátis exsultántes
Ad II vesperas:
Festívis résonent cómpita vócibus,
Cives lætítiam fróntibus éxplicent,
Tædis flammíferis órdine pródeant
Instrúcti púeri et senes.
Quem dura móriens Christus in árbore
Fudit multíplici vúlnere sánguinem,
Nos facti mémores dum cólimus, decet
Saltem fúndere lácrimas.
Humáno géneri pernícies gravis
Adami véteris crímine cóntigit:
Adami intégritas et píetas novi
Vitam réddidit ómnibus.
Clamórem válidum summus ab æthere
Languéntibus Géniti si Pater áudiit,
Placári pótius sánguine débuit,
Et nobis véniam dare.
Hoc quicúmque stolam sánguine próluit,
Abstérgit máculas; et róseum decus,
Quo fiat símilis prótinus Angelis
Et Regi pláceat, capit.
A recto instábilis trámite póstmodum
Se nullus rétrahat, meta sed última
Tangátur; tríbuet nóbile præmium,
Qui cursum Deus ádjuvat.
Nobis propítius sis, Génitor potens,
Ut, quos unígenæ sánguine Fílii
Emísti, et plácido Flámine récreas,
Cæli ad cúlmina tránsferas. Amen.
Ant.1:Quare ergo rubrum est induméntum tuum, et vestiménta tua sicut calcántium in torculári?
Laudáte, púeri Dómini,*
laudáte nomen Dómini.Sit nomen Dómini benedíctum*
ex hoc nunc et usque in sæculum.
A solis ortu usque ad occásum*
laudábile nomen Dómini.
Excélsus super omnes gentes Dóminus,*
super cælos glória eius.
Quis sicut Dóminus Deus noster,
qui in altis hábitat*
et se inclínat, ut respíciat
in cælum et in terram?
Súscitans de terra ínopem,*
de stércore érigens páuperem,
ut cóllocet eum cum princípibus,*
cum princípibus pópuli sui.
Qui habitáre facit stérilem in domo,*
matrem filiórum lætántem.
Ant.1:Quare ergo rubrum est induméntum tuum, et vestiménta tua sicut calcántium in torculári?
Ant.2:Tórcular calcávi solus, et de Géntibus non est vir mecum.
Crédidi, étiam cum locútus sum:*
«Ego humiliátus sum nimis».
Ego dixi in trepidatióne mea:*
«Omnis homo mendax».
Quid retríbuam Dómino*
pro ómnibus, quæ retríbuit mihi?
Cálicem salutáris accípiam*
et nomen Dómini invocábo.
Vota mea Dómino reddam*
coram omni pópulo eius.
Pretiósa in conspéctu Dómini*
mors sanctórum eius.
O Dómine, ego servus tuus,*
ego servus tuus et fílius ancíllæ tuæ.
Dirupísti víncula mea:†
tibi sacrificábo hóstiam laudis*
et nomen Dómini invocábo.
Vota mea Dómino reddam*
coram omni pópulo eius,
in átriis domus Dómini,*
in médio tui, Ierúsalem.
Ant.2:Tórcular calcávi solus, et de Géntibus non est vir mecum.
Allelúia.
Salus et glória et virtus Deo nostro,*
R,/Allelúia.
quia vera et iusta iudícia eius.
R./Allelúia, allelúia
R/.Allelúia.
Laudem dícite Deo nostro, omnes servi eius*
R/.Allelúia.
et qui timétis eum, pusílli et magni!
R/.Allelúia, allelúia
R/.Alléluia.
Quóniam regnávit Dóminus, Deus noster omnípotens.*
R/.Allelúia.
Gaudeámus et exsultémus et demus glóriam ei.
R/.Allelúia, allelúia
R/.Allelúia.
Quia venérunt núptiæ Agni,*
R/.Allelúia.
et uxor eius præparávit se.
R/.Allelúia, allelúia
ant.3:Beáti qui lavant stolas suas in sánguine Agni.
Lectio Brevis: Hebr. 9. 13-14.Si sanguis hircórum, et taurórum, et cinis vítulæ aspérsus inquinátos sanctíficat ad emundatiónem carnis : quanto magis sanguis Christi, qui per Spíritum Sanctum semetípsum óbtulit immaculátum Deo, emundábit consciéntiam nostram ab opéribus mórtuis, ad serviéndum Deo viventi?
Resp.Brev.
V. Redemísti nos, Dómine*in sánguine tuo.
R, Redemísti nos, Dómine* in sánguine tuo.
V.Et fecísti nos Deo nostro regnum.
R. In sánguine tuo.
V.Gloria Patri.
R. Redemísti nos, Dómine*in sánguine tuo.
AdMagnif.Ant. Unus mílitum láncea latus eius apéruit, et contínuo exívit sanguis et aqua.
Preces:
Salvatórem humáni géneris adorémus, qui mortem nostram moriéndo destrúxit et vitam resurgéndo reparávit. Humíliter postulémus: Sanctífica pópulum, quem sánguine tuo redemísti.
Redémptor noster, da nos passióni tuæ per pæniténtiam plénius adhærére,
-ut resurrectiónis glóriam consequámur.
Præsta, ut Matris tuæ, solatrícis afflictórum, protectiónem assequámur,
-mærentésque confortémus ea consolatióne, qua et ipsi a te recreámur.
Fidélibus concéde passiónis tuæ in ærúmnis suis esse partícipes,
-ut salutáre tuum in seípsis maniféstent.
Qui humiliásti teípsum, factus obœdiens usque ad mortem, mortem autem crucis,
-da servis tuis obœdiéntiam et patiéntiam.
Córpori claritátis tuæ defúnctos configuráre dignéris,
-nosque aliquándo eórum redde consórtes.
Oratio.
Deus, qui pretióso Unigéniti tui Sánguine univérsos hómines redemísti, consérva in nobis opus misericórdiae tuae, ut, nostrae salútis mystérium iúgiter recoléntes, eiúsdem fructum cónsequi mereámur. Per Dóminum.
No comments:
Post a Comment