Mass of the dead.

According to the modern Roman Rite.

Introit:
Requiem aeternam dona eis, Domine: et lux perpetua luceat eis. -- Te decet hymnus Deus, in Sion, et tibi reddetur votum in Jerusalem: exaudi orationem meam, ad te omnis caro veniet. V.: Requiem aeternam . . .

Collect.
Deus, cui próprium est miseréri semper et párcere, te súpplices exorámus pro fámulo tuo N., quem (hódie) ad te migráre iussísti, ut, quia in te sperávit et crédidit, concédas eum ad veram pátriam perdúci, et gáudiis pérfrui sempitérnis. Per Dóminum.

Gradual and alleluia*:
Requiem aeternam dona eis, Domine, et lux perpetua luceat eis. V.: In memoria aeterna erit justus: ab auditione mala non timebit.
Alleluia,alleluia, Requiem aeternam dona eis, Domine, et lux perpetua luceat eis. Alleluia.

*During Lent:
Tract:
Absolve, Domine, animas omnium fidelium defunctorum ab omni vinculo delictorum. V.: Et gratia tua illis succurrente, mereantur evadere judicium ultionis. V.: Et lucis aeternae beatitudine perfrui.

Offertorium:
(The portion in parentheses may be omitted)
Domine Jesu Christe, Rex gloriae, libera animas omnium fidelium defunctorum de poenis inferni et de profundi lacu: libera eas de ore leonis, ne absorbeat eas tartarus, ne cadant in obscurum: sed signifer sanctus Michael repraesentet eas in lucem sanctam: * Quam olim Abrahae promisisti, et semini ejus. (V.: Hostias et preces tibi, Domine, laudis offerimus: tu suscipe pro animabus illis, quarum hodie memoriam facimus: fac eas, Domine, de morte transire ad vitam. * Quam olim Abrahae promisisti et semini ejus.)

Super Oblata
Pro fámuli tui N. salúte hóstias tibi, Dómine, supplíciter offérimus tuam cleméntiam deprecántes, ut, qui Fílium tuum pium Salvatórem esse non dubitávit, misericórdem Iúdicem invéniat. Qui vivit et regnat in saecula saeculórum.

Preface:
Vere dignum et justum est, aequum et salutare, nos tibi semper, et ubique gratias agere: Domine sancte, Pater omnipotens, aeterne Deus: per Christum Dominum nostrum. In quo nobis spes beatae resurrectionis effulsit, ut quos contristat certa moriendi conditio, eosdem consoletur futurae immortalitatis promissio. Tuis enim fidelibus, Domine, vita mutatur, non tollitur, et dissoluta terrestris hujus incolatus domo, aeterna in coelis habitatio comparatur. Et ideo, cum Angelis et Archangelis, cum Thronis et Dominationibus, cumque omni militia coelestis exercitus, hymnum gloriae tuae canimus, sine fine dicentes:

Ant. Ad communionem
Lux aetérna lúceat eis, Dómine, cum Sanctis tuis in aetérnum, quia pius es. Réquiem aetérnam dona eis, Dómine, et lux perpétua lúceat eis, cum Sanctis tuis in aetérnum, quia pius es.

Postcommunion:
Dómine Deus, cuius Fílius in sacraménto Córporis sui viáticum nobis relíquit, concéde propítius, ut per hoc frater noster N. ad ipsam Christi pervéniat mensam aetérnam. Qui vivit et regnat in saecula saeculórum.

On the third, seventh, and thirtieth day after death or burial:

Collect:
Inclína, Dómine, aurem tuam ad preces nostras, quibus misericórdiam tuam súpplices deprecámur, ut fámulus tuus N., quem in hoc saeculo tuo pópulo misericórditer aggregásti, in pacis ac lucis regióne constítuas, et Sanctórum tuórum concédas esse consórtem. Per Dóminum.

Super Oblata:
Propitiáre, quaesumus, Dómine, fámulo tuo N., pro quo hóstiam tibi laudis immolámus, te supplíciter deprecántes, ut, per haec piae placatiónis offícia, resúrgere mereátur ad vitam. Per Christum.
Or:
Pláceat tibi, Dómine, sacrifícii praeséntis oblátio, ut ánima fámuli tui N., peccatórum véniam, quam quaesívit, te miseránte invéniens, cum Sanctis tuis semper exsúltet, et glóriam tuam in aetérnum colláudet. Per Christum.

Ant ad communionem:
Omne quod dat mihi Pater, ad me véniet, dicit Dóminus, et eum qui venit ad me, non eíciam foras.

Postcommunion:
Vitálibus refécti sacraméntis, quaesumus, Dómine, ut ánima fratris nostri N., quam testaménti tui partícipem effecísti, huius mystérii purificáta virtúte, in pace Christi sine fine laetétur. Qui vivit et regnat in saecula saeculórum.
Or:
Suméntes dona caeléstia, grátias tibi, Dómine, reférimus, humíliter deprecántes, ut ánima fámuli tui N., per Fílii tui passiónem a peccatórum vínculis absolúta, felíciter váleat ad te perveníre. Per Christum.